Kev Ntsuam Xyuas Cov CHW Hauv Wisconsin

Cov Lus Qhia
Cov Neeg Ua Hauj Lwm Saib Xyuas Kev Noj Qab Haus Huv Hauv Zej Zog los sis CHW yeej muaj lub luag hauj lwm tseem ceeb hauv Wisconsin lub laj txheej kev noj qab haus huv rau zej tsoom thiab kev pab kho mob. Qhov Kev Ntsuam Xyuas Cov CHW no yuav pab ua ntaub ntawv qhia, txhawb pab, thiab txhim kho cov neeg ua hauj lwm CHW hauv Wisconsin. Kev Ntsuam Xyuas Cov CHW yog ib qho kev soj ntsuam uas Wisconsin Department of Health Services Lub Khoos Kas Tiv Thaiv Tus Kab Mob Uas Kho Tsis Zoo Tu Qab (Chronic Disease Prevention Program, CDPP) thiab Wisconsin Lub Khoos Kas Kev Pib Hloov Pauv Kev Noj Qab Haus Huv Rau Leej Niam (Transforming Maternal Health, TMaH) tsim tawm los ntawm kev koom tes nrog Wisconsin Association for Community Health Workers (WiACHW) Pwg Tub Coj Xwm Pab Tawm Tswv Yim thiab WiACHW Pawg Thawj Coj. Lo tias “kev ntsuam xyuas” thiab “kev soj ntsuam” puav leej txhais tau tias yog Kev Ntsuam Xyuas Cov CHW Hauv Wisconsin.  

Qhov kev soj ntsuam no yuav tsum yog cov CHW ua tus ua. Qee zaum cov CHW yuav muaj cov npe hu sib txawv, tab sis txoj hauj lwm uas lawv ua hauv lawv lub luag hauj lwm yeej tseem puav leej zoo raws li lub American Public Health Association (APHA) lo lus txhais ntsiab lus. Thov saib APHA lo lus txhais ntsiab lus txog CHW hauv qab no ua ntej yuav mus ua qhov kev soj ntsuam no txuas mus tom ntej.

Cov CHW yog tus choj uas muab cov niam txiv pej xeem txuas mus rau kev saib xyuas mob nkeeg thiab cov peev txheej los pab kom lawv muaj kev noj qab nyob zoo. APHA muab CHW txhais hais tias yog “ib tug neeg ua hauj lwm saib xyuas kev noj qab haus huv rau zej tsoom ntaus thawj pem hauv ntej uas yog ib tug tswv cuab uas ntseeg siab tau thiab/los sis muaj kev nkag siab zoo tshwj xeeb txog lub zej zog uas muab kev pab cuam rau. Txoj kev sib raug zoo uas ntseeg siab tau no ua rau tus CHW tuaj yeem ua tus neeg dhia dej num/tus neeg txuas lus/tus neeg nruab nrab rau txoj kev noj qab haus huv/kev pab cuam zej tsoom thiab lub zej zog los pab txhawb pab kom nkag tau mus rau cov kev pab cuam thiab txhim kho qhov zoo thiab kev muaj peev xwm fab kab lis kev cai rau kev muab kev pab cuam. Tus CHW kuj tseem puav leej yuav txhim kho lub peev xwm ntawm tus kheej thiab lub zej zog tau los ntawm kev qhia kom muaj kev paub txog kev noj qab haus huv ntau dua qub tuaj thiab kev vam khom tus kheej tau dhau los ntawm ntau yam dej num xws li kev nthuav qhia kev paub, kev qhia paub hauv zej zog, kev pab sab laj tsis raws cai, kev txhawb nqa thiab kev tawm tswv yim hauv zej zog.”

Yog tias koj txoj hauj lwm zoo thooj li APHA lo lus txhais ntsib lus rau CHW, ces thov ua txuas ntxiv mus kom tau cov ntaub ntawv qhia paub ntau ntxiv los pab coj qhia koj ua qhov kev soj ntsuam no kom tiav.

Vim li cas thiaj li yuav tsum tau ua qhov kev soj ntsuam no? Vim tias nws yuav muaj txiaj ntsig los pab cov neeg ua hauj lwm CHW. Qee cov txiaj ntsig yog muab teev tseg hauv qab no. Qhov Kev Ntsuam Xyuas Cov CHW Hauv Wisconsin no yuav pab: 

• Ua ntaub ntawv qhia paub rau kev tsim txoj cai thiab kev kav siv mus ntev: Cov ntaub ntawv tau los ntawm kev ntsuam xyuas yuav pab tsim cov cai uas tau txais ntaub ntawv qhia paub los ntawm cov CHW. Qhov no yuav pab kom muaj kev them nyiaj ncaj ncees, muaj cov nyiaj txiaj ntsig, thiab kev pab nyiaj mus sij hawm ntev. Nws yuav txhawb pab kev sib koom ntawm cov CHW kom tau txais txiaj ntsig zoo.
• Txhais lub ntsiab lus txog pawg neeg ua hauj lwm: Qhov kev ntsuam xyuas no qhia txog lub luag hauj lwm C3 uas cov CHW tab tom ua hauj lwm rau. Tsis tas li xwb, kuj tseem puav leej qhia txog hom chaw hauj lwm thiab hom zej zog uas cov CHW ua hauj lwm rau tib si.
• Kev pab nrhiav pob nyiaj pab: Cov ntaub ntawv tau los ntawm kev ntsuam xyuas yuav qhia txog qhov loj me ntawm pawg neeg ua hauj lwm CHW. Nws yuav qhia txog txoj kev cuam tshuam uas cov CHW muaj hauv cov zej zog. Qhov no yuav txhawb kev pab nrhiav pob nyiaj pab uas ruaj khov, mus sij hawm ntev.
• Txhim kho cov txiaj ntsig kev noj qab haus huv hauv cov zej zog: Cov ntaub ntawv tau los ntawm kev ntsuam xyuas yuav qhia tias cov zej zog twg tseem xav tau cov peev txheej ntau ntxiv. Nws yuav qhia txog cov peev txheej uas cov CHW qhia hais tias lawv cov zej zog xav tau. Qhov no yuav txhawb nqa cov CHW lub luag hauj lwm suav nrog rau cov txiaj ntsig kev noj qab haus huv hauv cov zej zog hauv Wisconsin.
• Txheeb qhia txog kev cob qhia: Qhov kev tntsuam xyuas yuav qhia tias muaj pes tsawg tus CHW tau kawm qhov kev cob qhia txog Kev Muaj Peev Xwm Tseem Ceeb rau Cov CHW C3 lawm. Nws yuav qhia txog lwm yam kev cob qhia tshwj xeeb uas cov CHW tau kawm tiav lawm. Qhov no yuav pab kom paub tias seb yuav tsum tau muaj cov kev cob qhia twg rau pawg neeg ua hauj lwm.
• Nthuav dav kev koom tes thiab ua kom cov CHW lub luag hauj lwm muaj txiaj ntsig ntau tshaj plaws: Qhov kev ntsuam xyuas no yuav qhia txog lub luag hauj lwm tag nrho ntawm cov neeg ua CHW. Qhov no yuav pab kom feem saib xyuas kev pab kho mob, kev noj qab haus huv rau zej tsoom, cov neeg them nyiaj, thiab lwm tus khub koom tes muaj kev nkag siab zoo dua qub tuaj txog txoj hau kev rub cov CHW los ua hauj lwm, thiab ua kom lub luag hauj lwm, cov txuj ci thiab txoj kev txawj tsim nyog ntawm cov CHW muaj kev tshwj xeeb tshaj plaws.
• Taug qab saib kev loj hlob: Kev rov ntsuam xyuas dua zaum tas zaum ntxiv yuav qhia rau pawg neeg ua hauj lwm paub thaum lub sij hawm uas txoj kev xav tau pawg neeg ua hauj lwm muaj kev hloov pauv mus raws lub sij hawm. Qhov no yuav pab kom tuaj yeem muaj kev hloov pauv rau kev txhawb pab cov CHW hauv lawv lub luag hauj lwm.

Qhov kev soj ntsuam no yog dab tsi?

• Qhov kev soj ntsuam tsis yog tsim los txheeb xyuas cov CHW ua leej neeg.
• Nws tsim los sua cov ntsiab lus qhia txog txoj hauj lwm CHW tag nrho.

Qhov kev ntsuam xyuas no yuav nug koj txog qee yam ntaub ntawv qhia paub hais txog:

• Koj thiab koj txoj hauj lwm CHW
• Koj ua hauj lwm qhov twg
• Koj muaj feem koom rau koj lub chaw hauj lwm thiab tau txais kev txhawb nqa los ntawm cov thawj coj saib xyuas li cas
• Cov kev cob qhia uas koj tau kawm tiav thiab xav pom kom muaj
• Lub zej zog uas koj ua hauj lwm nrog thiab txoj hauj lwm uas koj ua
• Koj ua hauj lwm nrog cov neeg muab kev pab cuam thiab txoj cai li cas 
• Kev sib koom tes nrog lwm tus CHW 
• Koj tej kev xav txog txoj hauj lwm CHW

Ncua sij hawm: Ua qhov kev soj ntsuam no kom tiav tsis pub dhau lub Kaum Ob Hlis Ntuj Tim 31, 2026.  

Khwv yees lub sij hawm uas siv los ua qhov kev soj ntsuam no kom tiav: 20 txog 40 feeb. 

Cov lus qhia tswv yim txog qhov kev soj ntsuam

• Txhua nqe lus nug uas cuam tshuam txog koj lub luag hauj lwm tam li yog ib tug CHW. 
• Siv lub pob tshawb xyuas qhov kev soj ntsuam mus los nyob rau hauv qab kawg nkaus ntawm nplooj vev xaib los hloov kev tshawb xyuas hauv koj lub internet browser.
• Thov koj ua qhov kev soj ntsuam no kom tiav nyob rau tib zaug xwb. Tam sis, muaj ib qhov kev xaiv “ceev qhov koj tau ua tiav lawm thiab txuav ntxiv tom qab” (“Save and continue later”) 
  • Tom qab nplooj ntawv thib ib, koj xaiv qhov "Save and continue later" (ceev qhov koj tau ua tiav lawm thiab txuav ntxiv tom qab) uas nyob rau ntawm lub ces kaum sab saum toj ntawm sab xis. 
  • Tom qab ntawd, sau koj tus email. 
  • Ib qhov txuas mus rau lub vev xaib tshwj xeeb (unique link) yuav raug xa mus rau koj tus email ntawd. 
  • Siv qhov txuas mus rau lub vev xaib tshwj xeeb (unique link) ntawd txhawm rau koj rov qab mus ua kom tiav qhov kev soj ntsuam. Koj yuav tsum siv qhov txuas tshwj xeeb ntawd rau lub vev xaib (unique link) thiaj li pom tau cov lus teb uas koj tau ceev cia tseg. Tsis txhob muab qhov txuas tshwj xeeb (unique link) ntawd qhia rau lwm tus neeg. 
  • Wisconsin DHS CDPP pab tsis tau yog tias muaj teeb meem nrog qhov txuas tshwj xeeb (unique link) lossis kev nkag mus saib cov lus teb uas koj tau ceev cia tseg. 
• Qee nqe lus nug yuav muaj kev txwv txog cov lo lus uas tuaj yeej sau tau. Yog tias muaj kev txwv, ces cov lus ntau tshaj plaws uas tso cai sau tau yuav raug sau tseg rau hauv nqe lus nug thiab hauv lub qab npov sau ntawv.  
• Koj yuav tsum teb kom tiav tag nrho txhua nqe lus nug uas yuav tsum tau teb kom thiaj li tuaj yeem mus rau nplooj ntawv tom ntej los sis xa koj cov lus teb tau. Cov lus nug uas yuav tsum tau teb yog cov uas muaj lub cim hnub qub xim liab (*). 
• Thaum xaiv “Submit (Xa)” nyob rau hauv qab kawg ntawm nplooj vev xaib kawg lawm, ces koj yuav tsis tuaj yeem tshawb xyuas mus rau ib nqe lus teb dhau los twg lawm.
• Raws li DHS cov lus qhia, tsis txhob muab cov ntaub ntawv uas tuaj yeem txheeb qhia tus kheej tau (PII) los sis cov ntaub ntawv kev kho mob uas tau txais kev tiv thaiv (PHI) cia rau hauv koj cov lus teb.

Cov Lus Nug
Yog koj muaj lus nug dab tsi, thov tiv tauj rau DHSCommunityHealthWorkers@dhs.wisconsin.gov (subject line (kab ncauj lus): “Wisconsin CHW Census”).

Nqe lus tshaj qhia txog kev pab nyiaj los ntawm tsoom hwv teb chaws
Qhov kev soj ntsuam no yog tau txais kev txhawb pab los ntawm lub Centers for Disease Control and Prevention (CDC) ntawm U.S. Department of Health and Human Services (HHS) tam li yog ib feem ntawm kev pab nyiaj txiag tag nrho $1,908,833 uas yog tau txais nyiaj pab 100 feem pua los ntawm CDC/HHS. Cov ntsiab lus yog sau los ntawm tus kws sau ntawv xwb thiab tsis tau sawv cev rau cov kev xav los sis kev pom zoo los ntawm CDC/HHS, los sis Tsoom Hwv Teb Chaws Meskas.